ខេត្តកែប៖ កម្លាំងកងរាជអាវុធហត្ថខេត្តកែប បានបង្រ្កាបទាន់ពេលវេលា នូវករណីនាំចូលសាច់បង្កកដែលជាប្រភេទគ្រោះថ្នាក់ដល់សុខភាព។
នៅយប់ថ្ងៃទី២៨ ខែសីហា ឆ្នាំ២០២៣ កម្លាំងកងរាជអាវុហត្ថខេត្តកែប បានលួចឆ្មក់ចុះបង្រ្កាប ករណីនាំសាច់បង្កក ដែលជាប្រភេទសាច់ដែលមានគ្រោះដល់សុខភាព នៅចំណុចកំពង់ទូកនេសាទ (កិញលេខ០៤) ក្នុងភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប។
ជាមួយគ្នានេះដែរ កម្លាំងកងរាជអាវុធហត្ថដកហូតបានរថយន្ត ម៉ាកសាំងយ៉ុងមួយគ្រឿងរួមជាមួយនិង វត្ថុតាង សាច់បង្កកមួយចំនួនធំ ខណៈទូកពីរគ្រឿងទៀតដែលបានដឹកសាច់បង្កកនេះមក បានបើករត់គេចខ្លួនបាត់ស្រមោល។
គួរឱ្យដឹងដែរថា កាលពីថ្ងៃទី២៧ ខែសីហា ឆ្នាំ២០២៣ មន្រ្តីជំនាញសាខា ក.ប.ប. ខេត្តតាកែវក៏បានធ្វើការដុតកំទេចចោលនូវទំនិញខូចគុណភាព និងទំនិញហាមឃាត់ ក្នុងនោះមានគ្រឿងសមុទ្រ និងសាច់បង្កក ចំនួន ៨ ៨១២គីឡូក្រាម ដែលរឹបអូសបានកាលពីថ្ងៃទី២៦ ខែសីហា ឆ្នាំ២០២៣ កន្លងទៅនៅទីតាំងដីឡូតិ៍មួយកន្លែងស្ថិតនៅភូមិព្រៃមោក ឃុំស្រែននោង ស្រុកត្រាំកក់ ខេត្តតាកែវផងដែរ៕
